Monday, September 10, 2007

حرب الكلام



مع اني بعشق الابتسام ..
انا ليه بيعصرني الألم ؟
رغم إشتياقي للكلام
الصمت ليه بيشدني ؟
أو ليه بسافر في اللي فات؟
لو بكره كان بيهمني
طب ليه بخاف ؟
لما الأمان
يفرد شراعه يلفني؟!
----
ما بين حصار الأساله
بابحث لنفسي عن وطن
عن عمر بعته بدون تمن
محتاج زمان ألقيني فيه!
مش لجل يطويني الزمن
محتاج لحب الجاء اليه
لما يضيق الصدر
من فعل الخيانه والمحن

---
ما أضيعك...
ياللي انته عاشق للسفر ...
يا هل تري سعيك سراب ؟
ولا في غياب الوعي اضناك الوصول ؟
والقهر تاني يرجعك
فين يوجعك

-------
ياللي انته في فلك السواقي
مطرحك
قدرك تدور !!
الفرع ليه مل ارتباطه بالاصول؟
والاصل ليه عمال يلملم في الجدور ؟
والجدر في مهد الخصوبه والنما
شريانه اغشاه الضمور!؟
إشهق يا تلج الفكر فور
فسرلي معنات الامر
ليه الانتظار عمال يطول ؟
من غير وصول المنتظر؟
والبسمه ليه نشفت علي وشوش البشر ..؟
حتي الجميل مبقاش جميل
زي القمر !؟

ياقلب مزحوم بالضجر
طفل الأمل
راضع حليب الوهم من صدر الضياع

---------
ياعاشق الحلم المعفر في تراب
الا سكون.....
ابدر همومك في منابع أصلها
لو حتي تاني تلمها
صوب إيمانك في إتجاه إنك تكون
وإبكى اذا
كان البكى بيحفزك

4 comments:

Mohamed said...

بجد انا بحب الشعر الشعبي ده جدا
و كتاباتك فيها شيء من كتابات عمنا أحمد فؤاد نجم

امير المصري said...

احمد فؤاد نجم ده عملاق من عملاقة العاميه وانا افتخر وفرحت جداً برايك ده يا ريت اكون بيت شعر قالو عم احمد فؤاد نجم وشكراً علي التعليق يا محمد

Anonymous said...

انا بقول ان شعرك هايل بس مش عارف ليه مش عاوز يدخل جوايا يمكن ده مش اللى انا عايش فيه اليوميين دول بس هوة جميل جدااااااا.........سمسوم ابو الليل.!؟

احمد الخضري said...

الله يباركلك يا عم الشاعر

Follow and Subscribe

facebook
Related Posts with Thumbnails